Estrutura de contidos e servizos

A páxina de inicio de OV Tributaria é dende a que se accede aos servizos e contidos publicados pola Atriga. Para facilitar a experiencia do usuario a información e servizos vaise amosar sobre a mesma páxina co que nunca vai perder o contexto da súa navegación.

Por este motivo todas as páxinas van ter unha estrutura similar:

• Cabeceira. Onde se localizan os logotipos das imaxes institucionais e de OV Tributaria, a posibilidade do cambio de idioma e o mapa de organización da información.
• Navegación global. Onde hai a posibilidade de retornar ao inicio de navegación, de facer unha búsqueda global, onde se amosa a data e hora oficiais e o propio acceso a esta páxina (Axudámoslle).
• Espazo central. No que se vai producir as principais interaccións entre o usuario e OV Tributaria: vai poder acceder aos servizos, ao espazo personalizado (Meu espazo), e vai poder consultar os avisos para os usuarios.
• Utilidades e ferramentas. Contendo accesos: ao buscador parametrizado de trámites e servizos, a un espazo de descargas, ao servizo de verificación de documentos, e a información xeral e legal de uso de OV Tributaria.
• Pé de páxina corporativo da Xunta de Galicia onde hai a posibilidade de contactar coa Atriga a través do servizo de Atendémolo.

Durante a navegación do usuario é posible que se abran contidos ou servizos en novas ventás ou lapelas: ben polo acceso ao servizo específico que demanda o usuario ou ben a portais de terceiros para ampliar a información que se amosa.

Como acceder aos servizos electrónicos

O acceso aos servizos publicados en OV Tributaria pódese facer de tres xeitos diferentes:

• Mediante o buscador localizado na parte superior da páxina
• Mediante a navegación polas agregacións de servizos amosados no espazo central e principal de OV Tributaria
• Mediante o localizador de trámites por parámetros situado na parte inferior da páxina.

Para verificar a validez dos certificados do portal de OV Tributaria e, polo tanto, garantir a súa autenticidade, vostede pode empregar a plataforma Valide que o Ministerio da Presidencia ten dispoñible para tal fin.

Dende este portal poderá validar, inserindo a ligazón https://ovt.atriga.gal no correspondente cadro, que ten o certificado axeitado para operar en OV Tributaria.

Que me ofrece OV Tributaria?
A través de OV Tributaria, calquera cidadán poderá empregar distintos servizos de tramitación (pago de taxas, xestión de impostos, simulacións...), consultar a información dispoñible sobre os mesmos ou xestionar os datos que sobre el se gardan na Axencia Tributaria de Galicia.

Quen pode empregar OV Tributaria?
Calquera persoa. O único requirimento para realizar trámites ou empregar os servizos é ser maior de idade e, naqueles que o requiran, posuir un certificado dixital.

Que é o Meu espazo?
O Meu espazo, que só é accesible identificándose mediante un certificado dixital, é a zona personalizada na que o usuario poderá gardar aqueles accesos aos servizos que emprega con máis frecuencia, así coma información actualizada do estado no que están os trámites que ten abertos na Atriga.

Que e un trámite electrónico?
Un trámite electrónico consiste na realización dunha xestión coa Atriga empregando un servizo público electrónico daqueles dispoñibles en OV Tributaria.

Teñen a mesma validez as xestións realizadas en OV Tributaria que de xeito presencial?
Si. Teñen a mesma validez os trámites realizados a través de OV Tributaria que aqueles que son feitos de xeito presencial.

Que é un certificado dixital?
Un certificado dixital é un documento electrónico con funcións equivalentes a un documento oficial de identidade, e que serve para dar validez legal ás transaccións electrónicas que pode realizar calquera cidadán. É necesario para moitos dos servizos de Administración electrónica. Vai incorporado no DNI electrónico pero tamén pódese obter a través das entidades emisoras como a entidade de certificación das Cámaras de Comercio e a Fábrica Nacional de Moeda e Timbre.

Onde poido conseguir un certificado dixital?
O DNI electrónico xa leva incorporado un certificado electrónico. Tamén pode obter un certificado dirixíndose a calquera das autoridades certificadoras recoñecidas e que pode ser consultadas no Portal de Administración Electrónica.

É seguro empregar os servizos de OV Tributaria?
Calquera comunicación entre o usuario e a Axencia Tributaria realizada en OV Tributaria é segura. Toda a información que se comparte viaxa cifrada e os certificados dixitais garanten a identidade de ambas partes. Igualmente os datos persoais están cifrados e son almacenados na Atriga con total seguridade e confidencialidade cumprindo cos requirimentos da Lei Orgánica de Protección de Datos de Carácter Persoal.

 

Os servizos que publica a Axencia Tributaria en OV Tributaria teñen, ademais do acceso ao propio servizo, información en detalle para que o usuario coñeza en que consiste, para que sirve ou baixo que normativa é empregado.

Toda esta información preséntase nunha ficha estruturada que, na maioría dos casos, está composta por:

• Descrición do servizo. No que se explique de xeito breve en que consiste o servizo ou o trámite do mesmo.
• Tramitación. No que se informa de a quen afecta ou quen ten obriga de realizar a tramitación.
• Normativa. Listaxe de normativa que regula o servizo que se está presentando ao usuario.
• Axuda. No que se presenta información de utilidade para o usuario co obxectivo de que non teña ningún problema á hora de empregar o servizo.
• Clasificación. Onde se amosa a clasificación (tipo de trámite, tema relacionado, tipo de acceso ou colectivo) do servizo que se presenta.
• Botóns de acceso aos servizos. No que se amosa se o servizo é de acceso libre (candado aberto) ou restrinxido (candado pechado).
• Axúdanos a mellorar. Para que o usuario poida enviar calquera suxestión que supoña unha mellora da prestación dos servizos por parte da Atriga.

Ademais, e unicamente para usuarios identificados por certificado dixital, amosarase un Engadir ó Meu espazo para que poida dispoñer do seu acceso dende o seu espazo personalizado.